رند کے رند رہے، ہاتھ سے جنت نہ گئی

برطانوی ریڈیونے اپوزیشن رہنما مولانا فضل الرحمن کے حوالے سے تبصرے میں کہا ہے کہ :" مولانا فضل الرحمن سیاست کے مے خانے میں ”رند کے رند رہے، ہاتھ سے جنگ نہ گئی“ کی روشن تصویر ہیں۔ وہ آئیڈیل ازم اور عملی سیاسی تقاضوں کو نہ صرف خلط ملط نہیں ہونے دیتے بلکہ بے وقت کی راگنی پر بھی اپنا وقت ضائع نہیں کرتے۔یہ تبصرہ برطانوی ریڈیو کے کالم بات سے بات میں کیا گیا ہے۔ ریڈیو کے مطابق مولانا فضل الرحمن طالبان کے بھی ہیرو ہیں اور اینٹی طالبان لابی کے بھی آئیڈیل۔ وہ امریکا کے خلاف جب چاہیں آگ اگل سکتے ہیں اور جب چاہیں اس آگ پر ٹھنڈی بالٹی انڈیل سکتے ہیں۔ مولانا فضل الرحمن موجودہ کشمیر پالیسی کے بھی حق میں ہیں اور اس ناتے بحیثیت سرکاری ایلچی بھارت کے غیر سرکاری دورے کو بھی بہت اہم سمجتے ہیں۔ وہ نواز شریف کے بھی ہمدرد ہیں اور پرویز مشرف بھی انہیں اپنا آدمی سمجھتے ہیں۔ وہ قائد حزب اختلاف بھی ہیں اور سرکاری ہیلی کاپٹر کو بھی محبوب سواری جانتے ہیں۔ فضل الرحمن جمعیت علمائے اسلام کے جمگٹھے میں ہوں تو ملک میں اسلامی نظام کے نفاذ سے کم کسی بات پر راضی نہیں اور باہر ہوں تو جنرل مشرف کی اقتدار پسندی اور روشن خیالی کو بھی حرام نہیں کہتے، بس مکروہ سمجھتے ہیں۔ وہ فوج حکومت کے یکسر مخالف بھی ہیں اور موجودہ سیٹ اپ میں وزیر اعظم بننے کے خواہشمند بھی ۔ وہ ایک بالادست پارلیمنٹ بھی چاہتے ہیں لیکن نیشنل سیکورٹی کونسل میں اپنے ہی وزیر اعلیٰ کی شرکت پر انہیں کوئی اعتراض نہیں۔ الغرض مولانا فضل الرحمان فی الوقت واحد سیاستداں ہیں جو ایک ہی وقت میں 5مختلف رنگوں کی گیندیں ہوا میں اچھالنے کے ماہر ہیں اور ان میں سے کسی کو بھی زمین پر گرنے نہیں دیتے۔ ان ہی اوصاف کے سبب بعض مولانا فضل الرحمان کو محض ایک سیاستدان ہی نہیں بلکہ ون مین پولیٹیکل آرمی سمجھتے ہیں"اس تبصرے پر آپ کیا کہیں گے؟